SHILLONG: NPP aro sakbonga Congress dilgiparangni gisepo ning·joljol agangrikanirangko dakenga ine agangipa kattarangni gimin mamingkoba u·ija ine Rajya Sabha MP aro NPP State president Dr WR Kharlukhi Sonibaro aganaha, uamang party-o napgen ba napjawa uani giminde ja·manchisa ma·sigen ineba ua aganaha.
“Anga iani bidingo mamingkoba u·ija indiba chinga darangkon rimchaksoa, party-ona re·bana sikgipanade pilaknan do·gako oe donenga,” Dr Kharlukhi aganaha.
“Sakbonga Congress MLA-rang party-ona napgen ba napjawa ukode ja·manchi parakatgen, da·ode anga mamingkoba aganna man·kuja, indiba ukon aganenga, ching baksa bakrimna sikgipanade chinga darangnan oe on·enga,” ua agandapaha.
Sakbonga Congress MLA-rangi, NPP-ni re·dilgipa chaprime rikgipa MDA sorkarini chakpaaniko on·ani bidingo aganengon, ‘‘ Sorkariko rikchengaonin chinga kamrangko ka·enga aro gipin dilgiparang bakrimode uamang baksa nambate kamrangko ka·na man·gen ine anga kusi ong·a,’’ Dr Kharlukhi aganaha.
“Ian NPP aro unbaksa bakrimgiparangna kam namaniko mesoka, jeni a·selan gipinrangkoba ching baksa bakrime kamrangko ka·na didiatako man·aha,” ua agandapaha.
2023 Assembly poll-na NPP-ni chanchisoni bidingo singanina aganchakengon, mamingko agannaba da·o agre seng·gnangdugaenga indiba obostarangkode name nikenga indakoba manderang sana puongen, uasan ong·bataia, NPP dilgipa aganaha.
Indakeba nikatna man·a je sakbonga Congress MLA-rangoni mitamde NPP-on napna gita chanchienga ineba jangenga.
Sakbonga Congress MLA-rang aro National People’s Party (NPP)-ni gisepo ning·joljol agangrikenga ine All India Trinamool Congress (AITC) state dilgipa Mukul Sangmaba aganahachim.
