SHILLONG: Meghalaya a·dokona niam gri napsrukanirangko champengna gita Inner Line Permit (ILP)-ko ra·gatchengggijade a·dokona aro mongsongbate Khasi Hills jolrangona rel garirangko ra·napbana on·kujawa ine Sonibar salo, NPP-chi dilenggipa MDA sorkario bak ong·paenggipa People’s Democratic Front (PDF) parakataha.
“Re·anggipa bilsini September 18 tarikoba chinga a·dokni Chief Minister Conrad Sangma-ko gronge, ia jolrangona rel ramarangko taribakujachina didiahachim,” ine Sonibar salo, PDF-ni president aro a·dokni Cabinet Minister Banteidor Lyngdoh, kobor ra·timgiparangna parakataha.
Ri Bhoi a·jaona rel ramako taribana bi·aniko KHADC-ni jegalatani ja·man, Byrnihat-ona bostu salgipa rel garirangko ra·napbana man·na gita dingtang dingtang dolrang baksa agangrikangkugen ine Chief Minister-ni aganahachim ine nikna man·a.
Indake ong·engon, a·dokona niam gri napsrukbaanirangko champengna rakgipa niamrangko ra·gatkujaskal, manderangko salgipa aro bostu salgipa rel garirangkoba ra·napbana on·kujawa ine PDF-ni dilgiparang parakatskaaha.
“Meghalaya a·doko ILP-ko ra·gatchina dabiani bidingo ma·mong sorkari, da·onan maming aganchakanirangko on·kujaenga. Uni gimin ILP gita dakgipa niamrangko ra·gatkujaskal chinga rel garirangko ra·napbana on·kujawa,” ine Lyngdoh aganaha.
Meghalaya a·dokna ILP-ko dabina gita 2019 bilsion Meghalaya Legislative Assembly-oba dingtangmancha resolution-ko ra·manahachim ine nikna man·a. Uni ja·man Union Home Minister Amit Shah-ba baditaba chang a·dokona re·baanio a·dok sorkari baksa agangrikahaoba da·onan ILP-ni bidingo maming aganchakanirangko on·skakujaengachim.
