SHILLONG: West Khasi Hills a·jani Khalu Gare a·kingni ning·o donggipa A·sak A·bri jolrango niam gri koelarangko bikotenga ine badi ka·anirangko man·ahani gimin ia jolrango niam gri koela badingenggipa manderangni kosako rakgipa ja·kurangko de·china gita Opposition dolni dilgipa aro All India Trinamool Congress (AITC)-ni dilgipa Mukul Sangma, a·dokni Chief Secretary-ko didiataha.
Iani bidingo a·dokni Chief Secretary-na sedoatengon, West Khasi Hills a·jani Khalu Gare a·kingni ning·o donggipa dingtang dingtang koela a·damrangoniko niam gri koela bikotenga ine badi ka·anirangko man·soaha aro iani bidingo ta·raken am·sandianirangko dakenba, niam gri koela badingenggipa manderangni kosako rakgipa ja·kurangko de·na nangenga ine Bristibar salo Sangma parakataha.
Meghalaya a·doko niam gri koela badingenga ine matnanganirangko a·dok sorkari jegalengoba, da·ororo salantian dingtang dingtang biaprango niam gri koela badingenggipani bidingo badi ka·anirangko sorkari man·soskaengachim ine nikna man·a.
Adita salrangna skangsan, West Khasi Hills a·jani Nengchigen minggipa A·chik songo, silchidare ra·bitgipa manderangni dakchakanichi adita sak manderang, drae koelarangko bikotenga ine songni Nokma, Shallang police station-o badi ka·doangahachim.
FIR-ko Nengchigen songni Nokma Kristina Marak, re·anggipa February-ni 14 tariko ka·aha aro uni FIR-o parakatani gitade, Alnet Mark, Clington Marak, Pandit Momin, Toban Marak, Nazim Ali, Lipson Momin aro Pangseng Sangma minggipa manderang, Nengchigen songni a·kingo drae koelarangko bikotengachim.
Meghalaya a·doko niam gri koela bikotenggipa manderang, bobil dake chakatgipa dolrangko bikottaina cholrangko on·enga ine adita salrangna skangsan opposition dolni dilgipa Mukul Sangma-ba parakatahachim ine nikna man·a.