TURA: Garo Hills Autonomous District Council (GHADC)-ni gital chief executive membor (CEM)-ko seokna gita da·al Sonibar salo election-ko ong·atenga aro gital CEM-ni kamna election-ko ong·atanio Siju-ni NPP MDC Albinush R Marak aro Naguapara-ni AITC MDC Dhormonath Ch Sangma susaenga.
Garo Hills gimikon dingtang dingtang dolrangni jegalanirangko man·tokahani gimin GHADC-ni gitcham CEM Rakesh Sangma, re·anggipa antiosan kamtangko watangaha aro uandaken da·o gital CEM-ko seoktaina nangengahani gimin Sonibar salo election-ko ong·atenga.
Gital CEM-na NPP dolni gita Siju-ni MDC aro gitcham Deputy Chairman Albinush Marak-ko minge donsoahachim aro uandaken opposition AITC dolni gitaba CEM-ni kamna susana gita AITC-ni MDC Dhormonath Sangma-ko mingskaaha.
Sukrobar salo GHADC-ni gital Chairman-ko seokna election-ko ong·atanio NPP-ni candidate Sengchim N Sangma, AITC-ni candidate Rinaldo K Sangma-ko altubeen cheahani gimin CEM-na election-ko ong·atgijan Siju-ni MDC-ko gital CEM songaignok ine bang·a manderangan chanchisotokengachim. Indake ong·genchimoba, Chairman-na election matchotani ja·man, Naguapara-ni AITC MDC Dhormonath Sangma, CEM-ni biapna susana gita an·tangni nomination-ko file ka·angaha aro uandaken election-ko Sonibar salo ong·atna nangaha.
GHADC-ni gital Chairman-ko seokanio AITC-na chakenggipa MDC-rangoni saksa, chong·motan BJP MDC Promod Koch-ba NPP-ni candidate-na pu·onahachim.
