SHILLONG: People’s Democratic Front (PDF)-ni MLA-rang, National People’s Party (NPP)-o napskana miksongenga ine jangbingbanganiko PDF-ni president Banteidor Lyngdoh jegalataha.
Iandakgipa kattarangara PDF-ko bilgrie mesokna tol·e jangbingbanganisan ong·aia ineba Lyngdoh parakataha.
“Chini pilak MLA-rangan re·baenggipa election-o PDF-onin susagen aro Budget Session matchotahaon chinga election-na kamrangko a·bachenggnok. PDF-ko bilakbatatna chinga dingtang dingtang biaprangona wenroroanggen,” ine Lyngdoh aganaha.
2018 bilsini Assembly election-ona bate re·baenggipa 2023 bilsini Assembly election-o uamang bang·bate seat-rangko chegen ineba PDF-ni president a·kangataha.
“Batanggimin bilsibrini gisepo chinga manderangni nangnikanirangko chu·sokatna kamrangko ka·ahani gimin ia changode bang·bate chegnok,” ine ua aganaha.
PDF-ni miksonganiara manderangko chel·chakna, ripingna aro manderangna dangdike on·anian ong·a ineba Lyngdoh parakataha.
PDF dolba NPP-chi dilenggipa Meghalaya Democratic Alliance (MDA)-ni bakan ong·engachim aro da·o dipet PDF-o sakbri MLA-rang dongachim.
Adita salrangna skangsan PDF-ni MDC Macdalyne S Mawlong, NPP-o napahani gimin MLA-rangba NPP-o napnaba gnang ine dilgiparang chanchichiptokengachim.
