TURA: Adita salrangna skang, Indian Social Responsibility Network (ISRN) baksana South Garo Hills a·jani Health & Family Welfare department nangrimenba, COVID-19-ni tikarangko su·ani bidingo district level stakeholder-rangni tom·aniko Rongara C&RD Block-o aro Baghmara C&RD Block-ni ning·o donggipa Jaksongram songo ong·atangaha.
Ia tom·anirangko ong·atanio Rongara C&RD Block aro Baghmara C&RD Block-ni official-rang, dingtang dingtang VEC-ni president aro secretary-rang, Anganwadi worker-rang aro ASHA-rang dongpae bakko ra·angaha.
Je biaprangon COVID-ni tikarangko su·na jechaktokenga, ma·manti saanirang donga aro diltugipa biaprango songdongenga, uandakgipa manderangna tikarangko su·e on·na man·na gita Garo Hills-ni damgni a·jarango, ISRN-ni gita Momentum-Routine Immunisation Transformation & Equity (M-RITE) USAID project a·bachengatahachim.
Ia project-ni ning·o, diltugipa aro re·a doanio neng·ani ong·gipa a·ja damgnini biaprango COVID-19-ni awareness program-rangko ong·atangan baksana Vaccination Drive ba tika su·ani aro Vaccination on Wheels (VoW)-rangko a·bachengataha.
Ia tom·anirango Rongara PHC-ni Dr Uday R Marak aro Baghmara-ni District Malaria Officer Dr Bonnie D Shira, tom·anio bak ra·giparangna aganprakengon, COVID-19, Tetanus, Diphteria, Chickenpox, Hepatitis aro uandakgipa gipin sabisirangoni naljoke dongna man·na gita tikarangko su·e ra·na nangani gimin aganangaha.
Routine vaccination aro COVID-19 vaccination-ni bidingo manderang ma·sisrettokengani a·sel tikarangko su·e ra·na gong·tokjaengani gimin tika su·anio komibatenggipa aro re·a doanio neng·nikanirangko man·enggipa biaprangona tikarangko sokatna gita bilakbate kamrangko ka·na nangengani giminba ia tom·anio chanchirimangaha.
