SHILLONG: Sal 10-na ong·atanggipa Meghalaya Legislative Assembly-ni Budget Session-ko Bristibar attamo, dingtang dingtang kamrangko ka·e matchotataha.
Ia budget session-ko re·anggipa March 4 tariko a·bachengatahachim aro uandaken bon·kamgipa salo ‘The Meghalaya Appropriation (No.II) Bill, 2022’-ko man·chape gimik mingsni bill-rangko Assembly-ni membor-rang jinma ku·rang on·e ra·chakangaha.
Ia bon·kamgipa salo pass ka·e donanggipa gipin bill-rangara, Meghalaya Compulsory Registration of Marriage (Amendment) Bill, 2022, Meghalaya Settlement of Arrears under the State Taxation (Amendment) Bill, 2022, Registration (Meghalaya Amendment) Bill, 2022, Meghalaya Fiscal Responsibility & Budget Management (Amendment) Bill, 2022, Contingency Fund of Meghalaya (Amendment) Bill, 2022 aro Meghalaya State Agricultural Produce & Livestock Marketing (Promotion and facilitation) (Amendment) Bill, 2022 ong·achim.
2022-2023 bilsina tarigimin budget-ko a·dokni Chief Minister aro Finance Minister ong·enggipa Conrad K Sangma, re·anggipa March 9 tariko Assembly-o parakatahachim aro ia bilsina ua gong kror 1,849 ong·gipa deficit budget-ko parakatanio, gong kror 16,068-ni chu·gimik receipt-rang aro gong kror 17,917-ni chu·gimik expenditure-koba parakatahachim.
Ia budget session-ni bon·kamgipa salo pilak kamrangko matchotani ja·man membor-rang pilakan National Anthem-ko ring·e ia bilsini budget session-ko matchotataha.
