TURA: Shillong-oni Tura-ona re·baenggipa bus garirang seng·gnang re·baengani a·sel bang·bata manderangan garirangko srapjaengani gimin Shillong-oni Tura-ona re·baenggipa night bus garirangko attam 7:00 bajioni watskachina gita Raksamgre constituency-ni MLA Benedic R Marak, a·dok sorkariko didiataha.
Shillong-o re·ruraenggipa aro Shillong-oni gipin biaprangona re·ruraenggipa pilak bus garirangkon re·baenggipa April 1 tarik dipetde Mawlai-Mawiong-o donggipa Inter State Bus Terminus (ISBT)-oni salrurachina gita a·dok sorkari ge·etaniko on·angahachim.
Indake ong·engon, Shillong-oni Garo Hills-ona re·ruraenggipa aro mongsongbate sorkari office-rango kam ka·enggipa manderangni namgnina, Shillong-oni Tura-ona re·ruraenggipa night bus garirangko attam 7:00 bajioni watskachina Raksamgre MLA didiataha.
Garo Hills-ona re·baenggipa manderang, Shillong-ni ISBT-ona re·ruraanirango neng·nikanirangko man·jana gita Shillong songjinmani IGP Point aro Polo parking lot-o damrangko tik ka·e dingtangmancha ISBT shuttle ba manderangko salruraani garirangko donskachina gitaba Marak didiataha.
Indake ong·engon, Garo Hills-oni Nongstoin ba Guwahati rama gita Shillong-ona re·angenggipa manderangko Shillong civil hospital area aro Barik Point area-rangona sale donna man·na gita bus garirangna permit-ko on·china gitaba Raksamgre MLA mol·molataha.