Contractual teacher-rang service-ko ra·doani gimin jaja-jiji ong·toka

TURA: Garo Hills-o contractual post -o kam ka·gipa teacher-rang, uamangni kamko mikkangchina bariatna ba ra·doatna gital on·gipa ge·etaniko Shillong DSEL-ko talate on·china sing·ataha.
Teacher-rangni janapani gita, teacher-rangni appointment-ko extend ka·na kamo mikkangchina rakkiangani bidingo March 9 tariko DSEL aro March 12 tariko SDSEO Dadenggre, dingtang dingtang minggni ge·etaniko on·aha.
“Department, chingko contractual teacher-ni post-o ra·aha aro chingni kamko batanggimin bilsi 10-12 somoirangonin ra·dorikrikenga. Mitamrangko bilsi 4-5-onin kamko ra·dorikrikenga. Indiba da·ora department-ni tanggitik ge·etaniko on·atanio bang·a contractual teacher-rangan jajajiji ong·tokenga, ine teacher-rang aganaha.
Indake teacher-rang official-ko mikkangchi kamna rakkiangkuani bidingo name dake talate on·china mol·molataha. Gital ge·etako on·gipao maidakgipa niamrangko ja·rikna nanggen ba maidake mikkangchi kam ka·anggen iarangni gimin talate on·china mol·molataha.