TURA: Batanggimin bilsibrina sorkariko chalaianio NPP-chi dilenggipa MDA sorkari maming kamrangkon chu·sokatna man·jaha aro batesa a·dokni manderang, aro mongsongbate kam ka·e cha·enggiparang, an·tangtangni man·na nanggnirangko man·jae neng·nikanirangko chagrongna nangtokaha ine BJP-ni state vice president aro Tura-ni MDC Bernard N Marak matnangataha.
NPP-chi dilenggipa MDA sorkario BJP-ba bak ong·paengachim indiba batanggimin somoirangonin a·doko MDA sorkarini dingtang dingtang kamrangni bidingo a·dokni BJP dol matnanganirangko dakskaengachim ine nikna man·a.
Batanggimin somoirangoba a·doko tangka jakkalsretanirangna, niam gri koela bikotanirangna, Power department-o kamrangko ka·sretanirangna, ma·mong sorkarini scheme-rangko jakkalsretanirangna aro uandakgipa dingtang dingtang kamrangna a·dokni BJP dol, NPP-chi dilenggipa MDA sorkarini kosako matnanganirangko nikna man·ahachim.
Indake ong·engon, batanggimin bilsibrina sorkariko chalaianio ia sorkari, a·dokna aro a·doko songdongenggipa manderangna maming namgnirangko ra·bana man·jaha aro batesa dingtang dingtang kamrangko ka·e cha·enggipa manderang, an·tangtangni man·gnirangko man·jae, neng·nikanirangko chagrongna nangtokenga ine BJP-ni state vice president Bernard Marak matnangattaiaha.
“Meghalaya a·doko dingtang dingtang kamrangko ka·e cha·enggiparang, jekai Anganwadi, ASHA, SSA skigiparang, COVID-ni kamko ka·giparang, sorkari skulrango skigiparang, sorkari college-rango skigiparang, nurse-rang, muster roll-rang, contractor-rang aro gipinrangna man·gnirangko on·na man·gijaniara itihas gitasa ong·engaha. Ia dilgiparangko ia manderangan ka·donge seokahachim indiba uamangko ia dilgiparang cha·bokahani a·sel uamang dingtang dingtang neng·nikanirangko chagrongna nangtokskaengaha,” ine Marak parakataha.
Batanggimin bilsibrina Meghalaya sorkariko chalaianio bang·bea tangka paisarangko chame donahaoba ia sorkari, skul aro college-rangkoba namdapatanirang dongjaha ineba Tura-ni BJP MDC matnangataha.
“Garo Hills-o Tura Government College-ba gitchambatsranggipa college-rangoni damsa ong·paengachim indiba ia college-o classroom-rang chu·ongjae poraienggipa chatro chatrirang neng·nikanirangko chagrongna nangtokenga,” ine Marak parakatenba, ia college-ko namdapatna gita tangka paisarangko chamdape on·china aro skigiparangko rakkidapchina sorkario dabiangaha.
Garo Hills-o manderangni an·seng baljokanina ka·dongna nangenggipa Tura Civil Hospital-ni gimin janapatskaengon, ia hospital-rango manderangni nangchongmotgipa samrang dongjani a·selan manderang gipin pharmacy-rangonikosa bree jakkalna nangenga aro tangka paisarangko bang·en koros ka·na nangenga ine Marak parakataha.
“Batanggimin bilsibride indin ong·gramaigipa bilsirang ong·aha aro ia bilside iako bon·atani somoi ong·engaha. Ia bilsi brini gisepo a·dok re·mikkangna man·jaha aro ma·mong sorkarini chamatgipa project-rangonikoba dilgiparang aro uamangko ja·rikgiparangsan namgnirangko man·tokaiaha. Uni gimin ian dilgiparangna name chanchitaiani somoi ong·engaha aro kakket dilgiparang gita kamko ka·ani somoi ong·engaha,” ine Tura-ni BJP MDC parakataha.