TURA: Re·anggipa April-ni 29 aro 30 tarikrango ‘Women & Poetry’ ine pangchakaniko donenba National Seminar-ko North Eastern Hill University (NEHU) Tura Campus-ni ning·o donggipa Garo Department, All India Poetess Conference (AIPC) baksa nangrime, NEHU Tura Campus-o ong·atangaha.
Ia national seminar-ko ong·atna gita Shillong-ni ICSSR dakchake on·aha aro ia seminar-ona dingtang dingtang biaprangoni chatro chatrirang, skigiparang aro poedo serakgipa manderang re·bae, an·tangtangni segimin poedo aro gipin paper-rangko jinmana poraie on·angtokaha.
Ia seminar-ko ong·atanio NEHU Tura Campus-ni Campus-in-Charge Prof G Singaiah-ba dongpae, jinmana aganprakangengon, songsalko tang·doatna gita me·chikrangni jak on·paani gimin me·chikrangko demittele aganangaha.
Ia seminar-ni gnigipa salo, AIPC-ni foundation day-koba maniangjolaha aro iano AIPC-ko a·bachengatgipa Prof Lari Azad-ba dongpae bak ra·angaha. Ia seminar-ni gnigipa saloba ‘Women & Poetry’ ba Me·chikrang aro Poedo-o pangchake seminar-o bak ra·giparang, an·tangtangni poedorangko poraiangtokaha.
Ia seminar-ko ong·atanio AITC-ni founder Prof Lari Azad, kobor ra·timgiparang baksa agangrikengon, ia 2022 bilsini May 27, 28 aro 29 tarikrango AIPC-ni National Mega Conference-ko Tura-o ong·atanggen ine parakataha.
Ia seminar-ko ong·atanio AIPC-ni National Chairperson Prof Streamlet Dkhar-ba dongpae bak ra·angaha.
Ia National Seminar-ko ong·atania, Tura-o ong·atna sienggipa AIPC-ni Mega Conference-na tarisamsoani gitaba ong·aha.
