TURA: An·tangko Deputy Superintendent of Police (DSP) dakmikgipa mandeni kosako aro Tura Bar Association-ni membor saksa baksa jegrikako chipe ra·enba social media-o watpripraahani gimin ia mandeni kosako Tura-ni ukilrang, Women Police Station-ni Officer-in-Charge-na FIR ka·doangaha.
Koborko on·ani gitade, ia mandeara, kamoniko ra·gala man·enggipa police constable-sa ong·achim indiba ua manderangna an·tangko DSP ine tol·engachim.
FIR-o parakani gitade, ia mandeni biming chong·motara David Chetry ong·achim aro ua Facebook-o an·tangko David Alpineo ine mingjeenba, an·tangko DSP inmika dake, Bar Association-ni membor-rangko ku·mitdu on·jani giminsa an·tangni order-ko on·ningjaha ine matnangahachim. Ia obosta ong·aniara re·anggipa May 4 tariko ong·ahachim aro ia mande, ua somoio Tura Bar Canteen-ona re·ange, Bar association-ni membor saksa baksa jegrike, jegrikmitingko chipe ra·enba ja·mano iako social media-o watpripraatahachim.
Indake ong·engon, an·tangko DSP ine tol·engani gimin aro Tura Bar Association-ni membor-rangko tol·e matnangenba, chipe ra·gimin video-ko social media-rango watpripraatahani gimin Tura-ni ukilrang ia mandeni kosako FIR ka·doangaha aro ia mandeko rim·e nanga gita sastirangko on·china didiangaha.
Ia mandeni kosako ukilrangna nanga gita chel·chakanirangko on·china gitaba police-rangko didiataha.
