SHILLONG: Meghalaya a·doko joa kal·aniko niamo ong·atna gita a·dok sorkarini ra·gatenggipa Meghalaya Regulation of Gaming Act 2021-ko ra·galpilchina Hynniewtrep Youth Council (HYC) dabiangaha.
HYC-ni parakatani gitade, a·doko joa kal·aniko niamo ong·atna ia Act ba niamko ra·gataniara namen kragijani ong·enga aro a·dokko joa kal·gipa a·dok ong·atjana gita ia niamko sorkari, ra·galpilna nangchongmotenga.
A·doko kajinarangko ong·katatna gitade a·dok sorkari, gipin cholrangkoba ra·gatna man·aigen indiba a·doko joa kal·aniko niamo ong·ataniara songsalna ong·sianiko ra·baani gitasa ong·enga ine HYC-ni general secretary Roy Kupar Synrem parakataha.
Ma·manti festival ba manianirangko ong·ate koros ong·anirangko komiatchina, MP, MLA, MDC, gitcham MLA aro gitcham MDC-rangko board aro corporation-rango chairman, co-chairman, vice chairman aro uandakgipa kamrangko on·e tangka paisarangko game rojachina gitaba HYC, a·dok sorkariko didiangaha.
HYC-ni parakatani gitade, MP, MLA, MDC ba uandake gitcham membor-rangara sorkarioniko dormaha ba pension-rangko man·engani gimin iandake membor-rangna tangka paisarangko gamaniara sorkarina indin koros ong·ani gitasan ong·engachim.
A·doko tangka jakkalsretaniko chu·gimik champengchina gitaba HYC, a·dok sorkariko didiangaha.
