TURA: An·tangko Deputy Superintendent of Police (DSP) ina dakmike, Tura Bar Association-ni membor-rangni kosako kragija kamrangko ka·gipa mandeni kosako badi ka·aniko man·ani ja·man ia mandeko West Garo Hills a·jani police-rang, Mongolbar walo rim·aha.
Police-rangni kobor on·ani gitade, an·tangko DSP ina dakmike Tura ukilrangni kosako ong·gija kamko ka·gipa David Chetry-ko Mongolbar walo rim·aha.
An·tangko DSP ina dakmikan baksana Tura Bar Association-ni membor saksa baksa jegrikako chipe ra·enba social media-o watpripraahani gimin ia mandeni kosako adita salrangna skang, Tura-ni ukilrang, Women Police Station-ni Officer-in-Charge-na FIR ka·doangahachim.
FIR-o parakani gitade, ia mandeni biming chong·motara David Chetry ong·achim aro ua Facebook-o an·tangko David Alpineo ine mingjeenba, an·tangko DSP inmika dake, Bar Association-ni membor-rangko ku·mitdu on·jani giminsa an·tangni order-ko on·ningjaha ine matnangahachim. Ia obosta ong·aniara re·anggipa May 4 tariko ong·ahachim aro ia mande, ua somoio Tura Bar Canteen-ona re·ange, Bar association-ni membor saksa baksa jegrike, jegrikmitingko chipe ra·enba ja·mano iako social media-o watpripraatahachim.
Ia mandeko rim·ani ja·man police-rang, ia a·selni bidingo ning·tue sandianirangko dakna a·bachengataha ineba kobor on·aha.
