TURA: Adhoc skulrango skigiparangni dormaharangko bariatchina dabianiko chu·sokate on·china gita didie, Garo Students Union (GSU) central executive committee (CEC), a·dokni Chief Minister Conrad K Sangma-na sedoataha.
Adhoc skulrango skigiparangni dormahako bariatchina didiatengon, skigiparang neng·bee kamtangtangko ka·engoba bang·gija dormaharangkosan man·paengani gimin nokdangtangtangko chalaianio bang·a neng·nikanirangko chagrongna nangtokenga ine GSU-CEC-ni assistant general secretary Salman D Sangma parakatenba, adhoc skulrango skigiparangnaba sorkari skulrango skigiparang baksa apsan dormahako on·china a·dok sorkariko mol·molataha.
“Adhoc skulrango skigiparangnaba dormahako bariatchina aro gital dormahako on·china chinga nang·ko mol·molenga. Skigiparangni kamara chingni bi·sarangna aro chatro chatrirangna namen gamchatgipa ong·a. Uni gimin adhoc skigiparangnaba sorkari skulrango skigiparang gitan apsan dormahako on·pachina chinga didienga,” ine GSU-ni assistant general secretary parakataha.
Adhoc skulrango skigiparangna dormahako gong 18,000-chi bariatchina aro bilsiprako 5 percent ka·e bariatchina skigiparang dabitokengachim ine nikna man·a.