SHILLONG: Meghalaya a·doko NPP-chi dilenggipa MDA sorkari baksa bakrimanio kusi ong·nikjaenga ong·ode BJP wate re·angna man·aigen ine Meghalaya a·dokni Chief Minister aro NPP-ni national president Conrad K Sangma parakataha.
MDA sorkarini kamrangna matnangrongengani gimin aro adita salrangna skang, Mawdiangdiang-o rikenggipa gital Assembly building-ni protchong be·gruani gimin chief minister-ni kamko watchina dabiani ja·man Conrad Sangma, ia kattarangko parakataha.
“Da·o dipet ma·mongo BJP-ni dilgiparang chingna mamingkoba seata dongkuja, uni gimin iandake saksa sakgnini agananade anga mamingkoba aganchakna nangani dongja,” ine Chief Minister parakataha.
Gital Assembly building-ni potchrong be·gruaniko CBI-chi inquiry dakna gita Chief Minister ra·chakna nanga ong·jaode an·tangan kamtangko watna nanga ine Sombar salosan, Tura-ni MDC aro BJP-ni state vice president Bernard N Marak dabiangahachim ine nikna man·a.
A·dokni Chief Minister Conrad K Sangma aro Tura-ni BJP MDC Bernard N Marak sakgnian South Tura constituency-ni membor-rang ong·e re·baenggipa 2023 bilsini Assembly election-o susagrikani cholrang donga ine niksamsona man·engachim.
Batanggimin somoirangoba Tura-ni MDC Bernard Marak aro a·dokni gipin BJP-ko dilgiparang, NPP-chi dilenggipa MDA sorkarini dingtang dingtang kamrangna matnange songbadrango sedoatahachim ine nikna man·a.
Indake ong·engon, Chief Secretary aro Chief Minister-ni Secretariat-ni gadango a·dokni dingtang dingtang project-rangko name nirokenga ineba Chief Minister talataniko on·angaha.
NPP-chi dilenggipa MDA sorkarini kam ka·enggipa dingtang dingtang project-rangko nirokna gita committee-ko songchina Opposition dolni dilgipa Mukul Sangma-ni dabianina Chief Minister, ia kattarangko parakataha.
