SHILLONG: New Shillong Township-ni Mawdiangdiang-o rikenggipa gital Meghalaya Legislative Assembly building-ni protchong be·gruaoni antisa ja·man, ia rikenggipa nokko sorkari official-rang chipe donatchengaha.
Ia gital Assembly building-ni protchong be·gruahani gimin bang·a manderangan, ia nokko rikani bidingo sing·doanirangko daktokahachim.
Sonibar salo, mitam media-ni manderang, ia biapko nina re·angon, ua biapo donako man·enggipa police-rang, media-ni manderangko ia nok ning·chi napna gita on·jaha.
Ia nok ning·achi, kam ka·gipa manderangko nikatna gita man·ahachim aro ia biaponi sorkari gari bolsakoba re·ongkatangako nikrikna man·ahachim.
Ia gital Assembly building-ko Indian Institute of Technology (IIT)-ni official-rang, audit ka·na re·baengani gimin ia building-ko sorkari official-rang chipe donatchengaha.
Ia gital Assembly building-ni metric ton 4000-na batgipa protchong, May 22 tarik pringwalo be·gruahachim aro ia protchong be·gruani ja·man, dingtang dingtang political dolrang, NGO-rang aro a·doko songdongenggipa manderangba, ia nokko rikani bidingo sorkariko sing·doenba, CBI-chi inquiry-ko dakchina dabitokahachim.
Meghalaya a·dokni gitcham Assembly building-ko bilsi 20-mangna skang wa·al kamchipahachim aro untalan a·doktangni Assembly nok dongkujaengachim.
Da·o ia gital Assembly building-ko matchotangengahachim indiba protchong be·grutaiahani a·sel Assembly building-ko matchotna somoi nangdapskagnok.
