SHILLONG: NPP-chi dilenggipa MDA sorkarini a·bachengatgipa FlyBig sildoreng bilruraatani chu·sokgipa ong·jahani a·sel a·dokna gong kror 2-na baten noksan ong·aha ine Meghalaya Pradesh Trinamool Congress (MPTC) parakatenba, iani bidingo a·dokni Transport Minister Dasakhiatbha Lamare-ko kam watchina dabiangaha.
“Ua an·tangni daitorangko aro manderangni uo ka·donge seokaniko chu·sokatna man·jaenga ong·ode an·tangni kamko wate on·on nambatgipa ong·gen. Ia department-ko a·dokni Chief Minister, saoba kam changkalbatgipa mandena on·skana man·ode nambatgen,” ine Opposition dolni Chief Whip aro AITC-ni MLA George B Lyngdoh, kobor ra·timgiparangna aganaha.
Transport Minister-ko kam watchina dabiengoba ua maikoba pa·sike an·tangni kamko watna jechakaigen ineba Lyngdoh parakataha.
Transport department-ni chu·sokgijagipa kamrangko janapatengon, Mawiong-o inter-state bus terminus (ISBT)-ko rikaniba namja, a·dok gimikon niam gri weigh bridge-rangko chalaienga, nangana bate bostu salgipa garirangko nirok sandianirang dongjaenga aro uandakgipa chu·sokgijanirangko bang·en nikna man·enga ine Lyngdoh parakataha.
“Ia pilak kamrangan Transport department-ni kamrang ong·achim indiba uamang kamko ka·anio chu·sokna man·jaenga. Da·o uamang FlyBig sildoreng bilruraanikoba bon·chipate gong kror 2 tangkarangko a·dokna noksan ong·ataha,” ine MPTC-ni dilgipa aganaha.
