SHILLONG: Meghalaya a·dokni Samagra Shiksha Abhiyan (SSA) skulrango skigiparang, jabongani dormaharangko man·tokkujaengani gimin sorkarini kosako jingjengatengon, sorkarini maming aganchakaniko man·kujaengani gimin Bristibar salo, Meghalaya SSA Schools Association (MSSASA)-ni dilgiparang, a·dokni Governor Satya Pal Malik-ko gronge, an·tangtangni neng·nikanirangko janapeskaaha.
Governor-ko grongeani ja·man kobor ra·timgiparangna talataniko on·angengon, skigiparangni neng·nikanirangko namatchina a·dokni Governor, a·dokni Chief Minister-ko didiatahani gimin Governor-ko gronganiara chu·sokgipa ong·aha ine MSSASA-ni president Aristotle Rymbai parakataha.
“A·dokni Governor, Chief Minister Conrad Sangma baksa golpoatenba, SSA skulrango skigiparangna jabongani dormaharangko ta·raken on·china aro skigiparangni dabienga gita dormaharangko bariate on·china a·dok sorkariko didiataha,” ine Rymbai aganaha.
Rymbai-ni parakatani gitade, a·dokni SSA skulrango skigiparangna dormaharangko on·na man·na gita skanggipa bakni tangka paisarangko a·dokna on·atchina gita ma·mong sorkari baksa agangrikgen ineba Malik, uamangna ku·rachakaniko on·ataha.
SSA skigiparangni dabienga gita jabongani dormahako changsanon on·ani bidingo aro skigiparangni dormahako bariatani bidingo a·dokni chief minister, skigiparangko agangrikna okamkujaskal skigiparangni jingjengataniko dontongjawa ineba Rymbai parakataha.
SSA skulrango skigiparangna jabongani dormaharangko on·kujaengani gimin re·anggipa Sombar salonin sorkarini kosako jegale jingjengatanirangko daktokengachim ine nikna man·a.
