TURA: Garo Hills-o bijoliko on·anirang namsrangjaengani gimin aro Garo Hills-ni MeECL office-rango chu·onga gita kam ka·giparangko donjaengani gimin East Garo Hills a·jani dolbri NGO-rang, chong·motan GSU, FAF, FKJGP aro AIGU dolrang, Bristibar saloni salgnina Williamnagar-o donggipa MeECL office-ko picketing ka·na a·bachengataha.
NGO-rangni parakatani gitade, Garo Hills-na bijoli on·aniko namdapatchina, Power department-o mikkang niteani kam ka·giparangko rakkichina, Garo Hills-na MeECL-o chu·onga gita kam ka·giparangko rakkichina, Garo Hills-o kam ka·giparangko Khasi Hills-ona ra·jitangjachina, MeECL-ko chalaianio mikkang niteani gri ong·china, Shillong-o donggipa MeECL-ni head office-o A·chikrangkoba kamo rakkichina dabian baksana 2020 aro 2021 bilsirango Khasi Hills-o bang·en kam ka·giparangko rakkiahaoba Garo Hills-ode saksakoba kamo rakkidapjahani gimin jegale Williamnagar-o donggipa MeECL office-ko salgnina office picketing ka·engachim.
NGO-rangni dabienggipani bidingo Power department-ni gita maming aganchakanirangko on·jaengani gimin iana skangba NGO-rang, MeECL-ni kosako poster campaign-ko dake jingjengatangahachim.
Poster campaign-ko dake jingjengatani ja·manoba maming aganchakanirangko on·jahani gimin ia dolbri NGO-rang, Bristibar saloni a·bachenge salgnina MeECL office-ko picketing ka·na a·bachengataha.
Bristibar salo, Williamnagar-ni MeECL office-ko picketing ka·anio line-o nirokenggiparang aro bill collection counter-kode NGO-rang champengjahaoba, Sukrobar salode bill collection counter-koba chipe donanggen indiba line nirokenggipa manderangkosa champengani dongjawa ine NGO-rang parakataha.
Salgnina MeECL office-ko picketing ka·ani ja·manoba Power department-oni maming aganchakanirang dongjagenchimode Sonibar salo NGO-rang apsan tom·enba, mikkangchi ja·ku de·gnini bidingo chanchianggen ine u·iataha.
