SHILLONG: Meghalaya a·doko 108 emergency service-ko chalaina gita a·dok sorkari, gital company-ko ia bilsini September jao ra·baskagen.
Meghalaya a·doko 108 emergency service-ko chalaina gita GVK-EMRI baksa songgigrikani bakan bon·engahani gimin aro EMRI-o kam ka·enggipa manderangba ia company-ni kosako jegalanirangko dake jingjengatengani gimin gital company-ko ra·baskana Sukrobar salo, NHM-ni Mission Director Ramkumar S parakataha.
108 emergency service-ko a·bachengatpiltaiani gimin janapatengon, GVK-EMRI-o kam ka·enggipa manderang baksa a·dok sorkari, changgittamna tom·e agangrikaha aro EMRI-o kam ka·enggiparang da·o bakan kamtangtangko ka·piltaina ka·dongenga ine Ramkumar S parakataha.
Mission Director-ni parakatani gitade, Supreme Court-onin ge·etanirang dongani gimin EMRI-o kam ka·enggiparangko da·o dipetde regularise ka·na man·kujawa ine a·dok sorkari, EMRI-o kam ka·enggiparangna talate on·angaha.
“Uamangni kamko a·dok sorkari regularise ka·na nangnikgenchimoba iako dakna bil dongja,” ine Ramkumar aganaha.
HR policy-ni bidingo janapatengon, 108 emergency service-ko chalaina gital company-ko rima changantian kam ka·giparangna nanga gita nirok sandianirangko aro dormaharangko kraa gita on·na a·dok sorkari, union-ni membor-rangkoba okamgen ine Ramkumar parakataha.
108 service-ara manderangni janggirangko jokatna dongiminsa ong·ani gimin ia kamko kontasanaba uamang dontongatna sikja ine janapatengon, 108 service-ko chalaina gita sal 15-ni gisepon gital company-rangna tender on·aniko a·bachengatna sorkari, seachi ku·rachakaniko on·aha ine NHM-ni Mission Director parakataha.
“Ian a·songni kamsa ong·ani gimin gital company-rangko chalaina okamanio dingtang dingtang niamrangko sorkari ja·rikna gita nanga aro chinga gital company-ko September jani gisepode man·na ka·dongenga,” ine Ramkumar parakataha.
