SHILLONG: Sak 2447 Lower Primary (LP) skulni skigiparangko kamo regularise ka·china ku·pattianiko Mongolbar salo, a·dokni Cabinet ra·chakaha ine a·dokni Chief Minister Conrad K Sangma parakataha.
Chief Minister-ni parakatani gitade, ia skigiparangko da·o sorkari kamo regularise ka·na ra·chakahani gimin ia skigiparangba sorkario kam ka·giparangni man·enggipa pilak man·gnirangko man·tokgnok.
Skigiparangko regularise ka·china dabianiara ru·uta somoirangonin skigiparangni dabienggipa ong·achim ine janapatengon, “Chinga sak 2447 LP skulni skigiparangko kamo regularise ka·na tik ka·aha aro uamangba da·o sorkario kam ka·giparangni man·enggipa pilak man·gnirangko man·gnok,” ine Sangma parakataha.
1993 bilsio LP skulrangko a·dok sorkari jako ra·chengaoni bang·bea skigiparangkon sorkario kam ka·giparang gita regularise ka·aha ineba Chief Minister parakataha.
“LP skulrango skigiparangoni bang·batakon sorkari regularise ka·ahaoba sak 2447 skigiparangde watchanggalako man·ahani a·sel pension aro gipin man·gnirangko man·tokkujaengachim,” ine Chief Minister aganaha.
“Ia skigiparang dingtang dingtang a·selrangchi regularise ka·ako man·ningjaha aro ia a·selrangko anga che·em che·em niatpilna nangnikjaenga,” ineba Sangma aganaha.
Chief Minister-ni parakatani gitade, ua somoio district council-rangchi chalaienggipa dam 2,568 skulrangko a·dok sorkari jako ra·ani somoio dam 136 skulrang watchanggalako man·ahachim.
