SHILLONG: Ma·mongo a·songni Prime Minister Narendra Modi-ni dilanichi, BJP sorkari manderangna kamko ka·engani gimin Meghalaya a·dokoba manderang BJP dolo ka·dongchakenga ine Robibar salo, BJP-ni national executive membor Alexander Laloo Hek a·kangataha.
“Re·baenggipa 2023 bilsini Meghalaya Assembly election-na a·dokni manderang BJP dolo ka·dongchaktokengani gimin a·doko BJP-ko dilenggiparang, ia cholko ra·e name kamko ka·na nangenga,” ine BJP-ni MLA Hek parakataha.
2018 bilsio bang·a MLA-rangan BJP-o napahani a·sel mingsing minggamako man·ahachim ine sing·on, ia changode unona bate bang·batna sienga ine Hek parakataha.
“Politics-ode somoian mongsonggipa ong·a ine an·ching ma·sie ra·na nanga. Bang·a dilgiparangan BJP-o napna sike dongtokenga indiba MLA-rang, anti defection law dongani gimin da·o dipet BJP-o napna man·kujaenga. Uamangoni bang·batan election-na skangsa chingni dolo napgen,” ine BJP-ni national executive membor parakataha.
Hek-ni parakatani gitade, re·baenggipa election-o BJP dol, komibeoba dam 40 constituency-rango susana miksongenga aro ianoni komibeoba dam 10-oni dam 15 seat-rangkode chena ka·dongenga.
2018 bilsini Meghalaya Assembly election-o BJP dol seat damgnikosan cherikna man·aiaha ine gisik ra·atpilaniko on·angengon, 2018 bilsiko tosusaede da·o BJP dol bilakbataha ine Hek parakataha.
Meghalaya a·doko manderang, party-ko ong·ja indiba candidate-kosa nie seoka ineba ua talataniko on·angaha.
2023 bilsini Assembly election-an Meghalaya a·doko BJP dolna gital chasongko ra·baani gita ong·gen ineba ua a·kangataha.
