SHILLONG: Re·anggipa Sombar attamchibara 4:30 bajimango, Shillong songjinmani Mawlai jolo donggipa chadambe sakgni, Mawkyrwat-oni km 15-mang chel·ao donggipa Umngi chiringo sripe siaha.
Koborko on·ani gitade, a·songni jakgitelaniko maniani salo, Mawlai joloni sakdok chadamberang, Umngi chiringona picnic cha·na re·ange chiringo jroe roengachim indiba uamangoni sakgnide chi jrona changjae, chio sripe sina nangaha.
Chio sripe sianggipa chadambe sakgniara Mawlai Nongmali-3-oni bilsi 21 ong·gipa Bankyntiewdor Pdahkasiej aro Mawlai Mawtawar-oni bilsi 22 ong·gipa Bakordor Lyngdoh Mawphlang ong·achim ine kobor on·timgiparang u·iataha.
Sianggipa chadambe sakgnioni saksa Bankyntiewdor Pdahkasiej-ni manggisikode Mongolbar pring 6:00 bajimango, Umpung songni Bah Lam minggipa taxi driver, chioniko sandienba man·aha indiba saksani manggisikode ua, gipin manderangko gari salangna nangenba sandiangna man·jaha ine kobor on·aha.
Ja·mano Shillong-oni Search & Rescue Team (SRT), ua biapona re·angenba, chio gimakuenggipa sakgipin mandekoba sandiahachim indiba ia koborko seatengmiting somoiona kingkingde uko man·pilkujaenga ine kobor on·aha.
