SHILLONG: Assam aro Meghalaya a·dokni simarango meligrikna man·jaenggipa bangki damdok biaprangni bidingo a·dok damgnini sorkarirang bakan agangrikna a·bachenggnok ine Meghalaya a·dokni Chief Minister Conrad K Sangma parakataha.
“Assam aro Meghalaya a·dokni simarango ru·uta bilsirangoni meligrikna man·jaenggipa biaprangko angni sorkari namatna gita pilak nanga kamrangko ka·enga,” ine Sangma aganaha.
Chief Minister-ni parakatani gitade, Assam-ni Chief Minister baksa ua baditaba changna agangrikani ja·man, a·dok damgnini gisepo meligrikna man·jaenggipa dam 12 biaprangoni damdok biaprangko, chong·motan Tarabari, Gizang, Hahim, Boklapara, Khanapara-Pillangkata aro Ratacherra jolrangko skanggipa bako namatchengna a·dok damgnian tik ka·e kamrangko ka·aha.
Ia damdok jolrango meligrikgijaniko namatna gita a·dok damgnionin cabinet minister-rangni dilanichi regional committee-rangko songenba, dingtang dingtang songrangona re·ange songni manderang baksa agangrikaha ineba Sangma parakataha.
“Dolgittam regional committee-rangni report-rango pangchake Meghalaya aro Assam a·dokrang, Union Home Minister-ni mikkango MoU-o soi ka·grikaha,” ine Sangma aganaha.
A·doko tom·tomanirangko rakkina man·enga ine janapatengon, HNLC bobil dolba da·o Indian Constitution-ni ning·on, maming niamrangko donna gri sorkari baksa agangrikna kusi ong·e re·baaha ine Chief Minister parakataha.
“Bobil dol baksa agangrikaniko a·bachengataha aro ia agangrikaniko ta·raken matchotatna a·dok sorkari nangnikenga. India sorkarikoba pilak nanga dakchakanirangko on·engani gimin chinga mittelpilna ska,” ine Sangma aganaha.
