SHILLONG: Assam aro Meghalaya a·dokni simarango meligrikna man·jaenggipa biaprangoni damdok biaprangko namatchengna gita kam ka·anio, ia songrango donggipa manderangni nangnikani gitasa meligrikna man·jaenggipa dam 23 songrangoni dam 21-ko Meghalaya a·doko man·baaha aro damgnikode Assam-o man·angaha ine Mongolbar salo, Meghalaya a·dokni Cabinet Minister aro West Khasi Hills regional committee-ni chairman Renikton Lyngdoh Tongkhar parakataha.
“Meligrikna man·jaenggipa dam 23 songrangoni dam 21-kode chinga man·baaha aro song damgnikoba ia songrango donggipa manderangni nangnikani gitasa Assam-o man·angaha,” ine Tongkhar aganaha.
Assam aro Meghalaya a·dokni gisepo soi ka·grikgipa MoU-ko jegale, adita salrangna skang Nongstoin-o jinma tom·e re·jomaniko ong·atahani gimin ia kattarangko Tongkhar, manderangna talatna gita aganaha. Jinma jegale tom·bimonganiko Hynniewtrep Youth Council (HYC) dol, Athiabari aro Malangkona songrangko Assam-o napatahanina Hima Nonglang-na chakpae ong·atangahachim.
Tongkhar-ni parakatani gitade, ia songrangona regional committee-ni membor-rang re·ange songni manderang baksa agangrikeon, songni bang·bata manderangan Assam-o ong·na skaniko paraktokahachim.
Skanggipa damdok biaprangni bidingo manderang sorkariko jegaltokengon da·o bangki damdok biaprangni giminba a·dok damgnini sorkarirang agangrikaniko a·bachengattaina sienggipani gimin janapatengon, “Ian altua kam ong·jawa. Kamrangko ka·anio neng·nikanirangko man·gen indiba chu·sokatna man·aigen,” ine Tongkhar parakataha.
Da·o bangki dongkuenggipa damdok biaprangni bidingo a·dokni damgnini chief minister-rang, a·songni jakgitelaniko maniani ja·man, Guwahati songjinmao tom·e agangrikgen ine adita salrangna skangsan, Meghalaya a·dokni Chief Minister Conrad K Sangma parakatahachim.
