TURA: Adita salrangna skang, Garoland State Movement Committee (GSMC)-ni co-chairman Balkarin Ch Marak aro additional general secretary Bostone M Sangma-ni dilanichi GSMC-ni dilgiparang, Tripura a·dokona re·ange Tipraland a·dokna dabidilenggipa manderangko grongenba, Garoland aro Tipraland a·dokko apsan dabina tik ka·angaha ine u·iataha.
Koborko on·ani gitade, GSMC-ni dilgiparangm Tripura a·dokona re·anganio, Tripura Autonomous District Council-ni chairman aro Tipraha Indigenous Progressive Regional Alliance-ni president Pradyot Bikram Manikya Debbarma-ko grongenba, Garoland aro Tipraland a·dokna dabianio apsan ja·kurangko de·na chanchirimangaha.
Garoland aro Tipraland a·dokna dabianio, ia a·dok damgnini Tribal-rangko chel·chakani giminba dolgnini dilgiparang agangrikangaha ine u·iataha.
Tripura a·dokona re·anganio GSMC-ni dilgiparang, Tripura sorkarini Land & Revenue Minister NC Debberma-koba grongaha aro salgro salaram a·dokrango songdongenggipa Tribal jatrangko ku·cholsan ong·e Garoland a·dokna dabianio bakrimaniko on·china didiangaha ine u·iataha.
