TURA: Re·anggipa August-ni 26 aro 27 tarikrango, Tura-ni A·chik Literature Society (ALS), NEHU Tura Campus-ni Garo Department aro Mendipathar College-ni Garo Department baksa nangrime, skanggipa Regional Writers Workshop-ko North Garo Hills a·jani Mendipathar College-o ong·atangaha.
A·chik chadamberangko sea jotanio gisik nanggiparang ong·china didina aro sea jotani bidingo skie on·na gita ia workshop-ko ong·atangaha aro ia workshop-ko ong·atanio dingtang dingtang college aro university-rango poraienggipa chatro chatrirang aro sea jotanio gisik nanggipa manderang sak ritchagnimangni gita bakko ra·angaha.
Ia workshop-ko ong·atanio NEHU-ni Professor Fameline K Marak, Associate Prof Jacqueline R Marak, Associate Prof Dokatchi R Marak, Asst Prof Crystal Cornelious D Marak, Asst Prof Colnat B Marak aro Asst Prof Basan R Marak, maikai poedo, golpo aro novel-rangko research ka·e sena nangachim, uarangni gimin agan-skie on·angaha.
Ia workshop-ko ong·atanio poedo serakgipa mande sakgni, chong·motan Hiracliush M Sangma aro Kroshnil D Sangma-ba poedorangko seani bidingo, workshop-o bak ra·giparangna agan-skie on·angaha.
Ia workshop-ko a·bachengate on·angani somoio A·chik Literature Society-ni president aro NEHU Tura Campus-ni ning·o donggipa Garo Department-ni gitcham Head, Prof Caroline R Marak, jinmana aganprakangengon, A·chik chadamberang sea jotanio gisik nanganichi A·chik sea-jotaniko bang·batatna man·gen aro A·chikkukoba Indian Constitution-ni Eighth Schedule-o napatna gita krenge kamko ka·angkuna ine didianiko on·angaha.
Ia workshop-ko ong·atanio Mendipathar College-ni Principal in-charge Dr SK Chaudhary-ba dongpae jinmana aganprakangengon, ia workshop-ko ong·atanichi A·chikkuchi segipa jotgiparangko bang·bate nakatatna man·gen ine an·tangni ka·dongchakenganiko parakangaha.
Ia workshop-ko ong·atanio, Kroshnil D Sangma-ni segimin ki·tap kinggniko, chong·motan ‘Pagitchamni Gimaangenggipa Ku·rang’ aro ‘Ang Ku·rang Ku·mikte-1’ ki·taprangko A·chik Literature Society-ni president Prof Caroline R Marak-ni jakchi oprake on·angjolaha.
Ia workshop-ko a·bachengate on·angani somoio Assam Garo Sahitya Sabha-ni president Soroj J Sangma aro Sengister R Sangma-ba dongpae bakko ra·angaha.
Bon·kamgipa salo, workshop-o bak ra·giparangna A·chik Literature Society-ni secretary Dr Crystal Cornelious D Marak aro Mendipathar College-ni Vice Principal Liu Cleana D Shira-ni jakchi certificate-rangko suale on·angaha.
