SHILLONG: Meghalaya a·dok gimikon Code of Criminal Procedure, 1973 aro Code of Civil Procedure (CPC) 1908-ni niamrangko ra·gatna gita Governor-ni u·iatani bidingo name nichengna gita a·dokni damgittam Autonomous District Council (ADC)-rang konta 48 somoiko a·dok sorkarioniko bi·angaha.
Mongolbar salo GHADC, KHADC aro JHADC-ni dilgiparang, a·dokni Chief Minister Conrad K Sangma-ko grongenba, CRPC aro CPC-ko ra·gatna u·iatanichi district council-ni kacharirangna on·gimin bilrangko bilgriatani gita ong·gen ine janapangtokaha.
Chief Minister baksa tom·e chanchirimani ja·man, kobor ra·timgiparangna talataniko on·angengon, “Iani bidingo ainni gimin u·i-ma·sigipa manderang baksa chanchirimna chinga konta 48 somoiko bi·aha. A·dok gimiko CRPC aro CPC-ko ra·gatna miksongenggipani bidingo damgittam ADC-rangan ja·mano an·tangtangni gita Chief Minister-na aganchakaniko on·anggen,” ine GHADC-ni Deputy Chief Executive Membor Nikman Marak parakataha.
Iani bidingo damgittam ADC-rangan an·tangtangni gita chanchirimanirangko dakanggen ineba ua parakataha.
Marak-ni parakatani gitade, Meghalaya a·doko ia minggni niamrangko ra·gataniara district council-ni kacharirangna on·gimin bilrangko bilgriatani gita ong·gen ine ADC-rang jajrengchakenga.
“District council-ni kacharirang, skango man·gimin bilrang gnangan chalaiangkuna man·na gita chinga a·dokni Chief Minister-ko didiaha,” ine Marak aganaha.
Iani bidingo KHADC-ni CEM Titosstarwell Chyne-ba chakpaaniko parakatengon, ia niamrangko ra·gatanio district council-ni kacharirangna on·gimin bilrangko pe·ani dongjawa ine chief minister, ADC-rangna ku·rachakaniko on·ataha ine talataniko on·angaha.
