TURA: Tura-ni A·konggre gittimo Urban Affairs department-ni rikgipa Commercial Complex-cum-Parking Lot-ko mijal Sukrobar salo, a·dokni Chief Minister Conrad K Sangma-ni jakchi nokdonggae on·angaha aro ia complex-ko nokdonggae on·anganio North Tura-ni MLA Thomas A Sangma, West Garo Hills a·jani Deputy Commissioner Swapnil Tembe, SP VS Rathore, Urban Affairs department-ni officer-rang aro jolo songdongenggipa manderangba dongpae bak ra·angtokaha.
Ia complex-ko gong kror 25 tangkarang koros ong·e rikahachim aro ia noko dokkanrang, office-rang aro dingtang dingtang biaprangba donggen.
Ia commercial complex-cum-parking lot-ko nokdonggae on·angani somoio a·dokni Chief Minister, jinmana aganprakangengon, Tura jillako nitobatatna aro jillao songdongenggipa manderangni neng·nikanirangko namatna gita uni sorkari rake kamrangko ka·enga ine parakangaha.
Chief Minister-ni ia tom·anio jinmana parakatani gitade, Smart Town project-ni ning·o Tura jillako nitobatatna aro jillani dingtang dingtang gittimrango donggipa ramarangko tarina gita sorkari, gong kror 55 tangkarangko koros ka·aha aro unbaksana gital ramarangko tarina gita gong kror 15 tangkarangko chamate, gitcham ramarangko taridapna gitaba gong kror 13 tangkarangko koros ka·aha.
Tura jillako nitobatatani gnigipa bako Tura Bazar-ni circular road-ko jako ra·e iana gong kror 5-oni kror 6-mangona sorkari koros ka·gen ineba Chief Minister parakataha.
Ia tom·anio North Tura-ni MLA aro Chief Minister-ni adviser Thomas A Sangma-ba jinmana aganprakengon, ia sorkarini rakbee kamrangko ka·enganichi Tura jilla namroro silrorona man·engaha ine parakangenba, Tura jillako namroro silroroatna aro nitobatatna kam ka·anio pilakkon ku·cholsan nangrime kam ka·china didiangaha.
Tura A·konggre-o commercial complex-cum-parking lot-ko CM-ni jakchi nokdonggaa
Date:
Share post:
