TURA: All Garo Hills Merchants Association-ni brigipa foundation day-ko mijal Sukrobar salo, Tura-ni District Auditorium-o maniangaha aro ia program-ko ong·atanio a·dokni Chief Minister Conrad Sangma, mongsonggipa sokgipa ong·e bakko ra·angaha.
AGHMA-ni brigipa foundation day-ko manianio a·dokni Chief Minister jinmana aganprakangengon, ia jolrango bading chiwale cha·enggipa manderangni namgnina kamrangko ka·engani gimin AGHMA-ko mittelpilangenba, mikkangchi chadamberangkoba bading chiwalani kamrangko mesoke on·na aro bading chiwalani bewalrangko skie on·na gita kamrangko ka·china association-ni member-rangko didiangaha.
Meghalaya a·doko bading chiwalenggiparangko tang·doatna gita sorkarini jako ra·e ka·enggipa dingtang dingtang kamrangni giminba ia tom·anio ua agan-talate on·angaha.
A·doko bading chiwalenggipa aro game ge·e cha·enggipa manderangko dakchakna gita sorkarini ra·gatgipa program-rang, jekai PRIME, FOCUS, FOCUS+, PROGRESS aro uandakgipa program-rangni gimin talataniko on·angengon, ia program-rangko ra·gatanichi sorkari, tangka paisarangko on·e bading chiwalgipa aro game ge·e cha·enggipa manderangni kamrangko tang·doatna man·engaha ine Chief Minister parakataha.
Meghalaya a·doko Ginger Mission, Turmeric Mission, Milk Mission aro Aqua Mission gita dakgipa program-rangko ra·gatanichi joltango bading chiwale cha·enggipa manderangna gong kror 1000-na baten man·gnirangko on·na man·aha ineba Chief Minister, ia tom·anio parakataha.
AGHMA-ko 2019 bilsio songahachim aro uandaken ia dolko songaoni da·o bilsigittam gapengahachim ine nikna man·a.
