Garo Hills-o gipin jatrangni skatang napbaaniko champengchina GSMC didia

TURA: Gipin biaprangoni manderang, Garo Hills-o kamrangko ka·e cha·na aro bading chiwale cha·na re·baenba bang·a changon A·chik songrango ong·gija kamrangko ka·e katrongenga ine Garoland State Movement Committee (GSMC) parakatenba, gipin biaprangoni Garo Hills-ona skatang re·napbaaniko champengna gita dingtangmancha niamrangko ra·gate on·china Garo Hills Autonomous District Council (GHADC)-ko didiataha.
Iani bidingo GSMC-ni dilgiparang, dingtangmancha memorandum-ko GHADC-ni Deputy Chief Executive Membor Nikman Ch Marak-na on·eaha aro Deputy CEM-na sedoatgipa memorandum-o GSMC-ni parakatani gitade, bang·a changon gipin biaprangoni re·bae kamrangko ka·e cha·enggipa aro ma·manti bading chiwalanirangko dake cha·enggipa manderang A·chik songrango, me·chik bi·sarangko skatang kal·ake rona aro ong·gija kamrangko ka·na cholrangko ra·rongengachim.
“Gipin biaprangoni re·bae kamrangko ka·e cha·enggipa aro ma·manti bading chiwalanirangko dake cha·enggipa gipin jatrang, A·chik songni me·chik bi·sarangko rope kragija kamrangko ka·enga aro A·chik songrango so·sojengjeng ong·anirangko ra·bana jotton ka·rongenga. Uni gimin mikkangchi iandakgipa kamrangko champengna gita niamrangko ra·gatchina aro gipin biaprangoni niam gri re·baenggipa manderangko champengchina chinga nang·ko mol·molenga,” ine GSMC-ni assistant general secretary Cyril A Sangma, GHADC-ni Deputy CEM-na sedoatgipa chittio parakataha.