WILLIAMNAGAR: East Garo Hills a·jani Rongjeng C&RD Block ning·o donggipa Mejolgre Chekjrongbra songo, Chichra chiringko kabatenggipa dolongko bilsichet ong·piloba matchotkujaenga.
Koborko on·ani gitade, ia dolongko rikna gita gitcham Congress sorkarini somoion tangka paisarangko chame on·ahachim indiba ia dolongko rikenggipa contractor, kamko name ka·jaengani a·sel da·o bilsichet ong·pilona kingkingan matchotchipkujaengachim.
“Ia dolongko matchotkujaengani a·sel chinga neng·nikanirangko chagrongna nangtokengani gimin chinga changni chang PWD-na sedoatahachim indiba da·onan ia dolongko matchotate on·kujaenga,” ine songni sordar Dikkin G Momin parakataha.
Momin-ni parakatani gitade, ia dolongara ia song gita tarigipa PMGSY ramani bakan ong·achim.
Iani bidingo songni manderang, a·dokni Chief Minister Conrad Sangma-naba u·iate, ia dolongko ta·rake matchotatchina mol·molatahachim indiba indinsa ong·gramaienga ineba songni sordar parakataha.
Ia dolongko matchotahaode ian Mejolgre Wancho Wancho, Rongchek Akong, Dagal Nokat, Salgitchak, Mejolgre Dogru, Jalwagre, Nengsil aro Chibilbang Bolkret Wadro songrangna bang·a namgni ong·gnokchim ineba sordar parakataha.
“Ia dolongko matchotahaode chingni songrangonaba gari gorarang re·bana man·gnokchim aro chingni janggi tangani gadangrang adita dingtanggnokchim. Ia dolongko matchotahaode chingaba Williamnagar, Songsak, Krishnai, Goalpara aro dingtang dingtang biaprangona altubate songre songgabatna man·pagnokchim indiba chingni niksogipa jumangrang da·o indin ong·gramaienga,” ine songni sakgipin mande, Prem Sangma aganaha.
Wachini somoirangode ia Chichra chiring ta·rakani gimin manderang wa·ani dolongkosa tarie re·ruratokenga indiba ian manderangna namen kenchakna nangani ong·enga ineba songni manderang parakataha.
“Skulrango poraienggipa bi·sarangba ia wa·ani jal·lang gitasa dingtang dingtang biaprangona re·ruraenga aro wachini somoirangode chi namen ta·rakani gimin ian bi·sarangna kenchakna nangani ong·enga,” ine songni sordar parakataha.
Koborko on·ani gitade, ia dolongni mongsonggipa bimangkode matchotahachim indiba uni ja·man bilsidoknade ia dolongko apsan daken donchipengkuachim.
Iani bidingo PWD official-rango sing·sandiaton, ia dolongko da·o bilsi bon·ange mikkarang tipangahaon tarina a·bachengatpilgnok ine parakatskaaha.