TURA: NFSA-ni ning·o AAY aro PHH-ni namgnirangko man·enggipa nokdangrangna Pradhan Mantri Ujjwala Yojana (PMUY) scheme-ni gittamgipa bakni ning·o indin LPG cylinder-rangko sualatgen ine West Garo Hills a·jani Deputy Commissioner (Supply) u·iataha.
Indin on·enggipa LPG cylinder-rangko ra·na gita dorgasto/KYC form-rangko pilak LPG retail outlet-rangoniko ra·ena man·gen aro iana AAY/PHH Card-ni photo copy, Voter ID Card-ni photo copy, SBI Zero Balance bank account aro passport size photo-ko kingsa nanggen ine u·iataha.
Deputy Commissioner (Supply)-ni u·iatani gitade, ia scheme-ni ning·o indin on·enggipa LPG cylinder-rangko ra·na gita Meghalaya aro Assam a·doko songdongenggipa manderangde Aadhar Card-ko nangjawa.
Iani bidingo talbate ma·sie ra·na gita AAY aro PHH beneficiary-rang, an·tangtangni sepangbatgipa LPG dokkanrangoniko sing·sandie ra·na man·gen ine u·iatengon, dingtang dingtang retail outlet gita LPG cylinder suale on·aniko nirokatenba, jaantian Deputy Commissioner-ni office-o report ka·china gita West Garo Hills a·jani Deputy Commissioner (Supply), Tura-o donggipa Supply-ni pilak inspecting officer-rangko didiataha.
West Garo Hills a·jao AAY aro PHH-ni namgnirangko man·enggipa pilak manderangkon ia cholko ra·china gitaba ua didiataha.
