TURA: Meghalaya a·doko 108 emergency service-ko dontongatani a·sel manderang aro mongsongbate tanggitik a·sel ong·aniko chagrongna nangenggipa manderang neng·nikanirangko chagrongna nangtokenga ine All Meghalaya Minorities Students Union (AMMSU) parakatenba, a·doko songdongenggipa manderangni namgnina ta·raken 108 emergency service-ko a·bachengatpiltaichina a·dok sorkariko didiataha.
AMMSU-ni parakatani gitade, Meghalaya a·doko 108 emergency service-ko a·bachengataonin a·dokni manderang aro mongsongbate rang·gitik a·sel ong·anio dakchakaniko nangenggipa manderang, pilakni gitan dakchakanirangko man·tokengachim indiba jagnimangna skang a·doko 108 emergency service-ko dontongatahani a·sel manderang nanggitikan somoirango neng·nikanirangko chagrongna nangtokengahachim.
“Meghalaya a·doko 108 service-ko dontongataonin, a·doko songdongenggipa manderang, tanggitik an·o donggipa me·chikrangko hospital-rangona ra·na nanganio aro tanggitik a·sel ong·ani somoirango dakchakaniko on·giparang dongjaengani a·sel neng·nikanirangko chagrongna nangtokengaha. Uni gimin a·doko songdongenggipa manderangni namgnina ta·raken 108 emergency service-ko a·bachengatpiltaichina chinga mol·molatenga,” ine AMMSU-ni president, National Health Mission-ni Mission Director-na sedoatgipa chittio parakataha.
Meghalaya a·doko 108 service-ko GVK-EMRI company-sa chalaiengachim indiba ia company baksa songgigrikaniko sorkari ra·galpilani ja·man da·o 108 service-ko chalaina gita gital company-na sengkuengachim ine nikna man·a.
