TURA: Meghalaya a·dok gimikon CrPC aro CPC-ko ra·gatna gita a·dok sorkari miksongengon, Khasi Hills-o Khasi Hills Autonomous District Council (KHADC) jegalenga gitan Garo Hills-oba Tribal-rangni a·jao CRPC aro CPC ra·gataniko jegalchina gita Williamnagar-ni Trinamool Congress (TMC) MDC Alphonsush Marak, Garo Hills Autonomous District Council (GHADC)-ni Executive Committee (EC)-ko didiataha.
Marak-ni kobor ra·timgiparangna parakatani gitade, ia CrPC aro CPC-ara India a·songni niam bidiko on·gimin niamo pangchake Sixth Schedule a·jarangode ra·gatna niam dongjachim.
“Maini gimin Meghalaya a·dokni Tribal a·jarangoba ia CrPC aro CPC-ko a·dok sorkari ra·gatna nangnikenga? Iako an·ching pilakan ra·chakna man·chongmotjawa aro jegalna nangani ong·enga. Meghalaya a·dokni Tribal a·jarango CrPC aro CPC ra·gataniko KHADC-de raken jegalenga aro GHADC-ba iako apsan daken jegalna nanga,” ine Williamnagar-ni MDC parakataha.
B-Mahal-ni je biaprangon manderang songdong a·chaa dongjachim, uandakgipa biaprangkosan development-ni kamrangna ra·gen ine September-ni 6 tariko GHADC EC-ni parakatanikoba TMC-ni MDC raken jegalataha.
Marak-ni parakatani gitade, adita salrangna skang, iani bidingo TMC-ni dilgiparang, Raksamgre sub-division-ni ning·o donggipa Sualmari-oni Kalitapara-ona re·ange, B-Mahal ning·o ga·akgipa songni Nokmarang aro Gaonburarang baksa tom·e chanchirimanirangko dakangaha.
“Raksamgre jolo donggipa B-Mahal ning·o badia biaprango manderang songdong a·chaa dongja uko mesoke on·china chinga GHADC-ni EC-ko ra·bienga. Ia jolrango manderangni songdong a·chagijagipa miksaba biaprang dongja aro ia jolrango songdongenggipa manderang, batanggimin bilsi 17 ba 18-mangonin ia biaprango songdong a·chatokenga,” ine Marak parakataha.
