TURA: Jharkhand a·doko Coal India-ni koela watna dakkianiko Garo Hills-ni bading chiwalgipa Georgeman S Marak man·ahani gimin da·o skanggipa changna Jharkhand a·dokni koelarangko Meghalaya a·dok gita Bangladesh a·songona ra·anggnok.
Georgeman Marak-ni u·iatani gitade, Jharkhand a·dokni skanggipa metric ton 3300 koelarangko re·anggipa September 24 tariko Bokaro-oniko watataha aro ia koelarang, Budbar pringo, Assam a·dokni Goalpara train station-ona sokbaaha. Ia koelarangko da·o Assam aro Meghalaya a·dokni dingtang dingtang koela watram biaprang gita Bangladesh a·songona watatgnok.
Uni iandake Jharkhand a·dokoniko koela ra·baaniara Bangladesh a·songo koela badinggiparangna aro karkanarangko chalaienggiparangna bang·a namgni ong·skagnok ine Bangladesh a·songo bading chiwale cha·enggipa manderang parakataha.
“Meghalaya a·doko koelarangko bikotanio neng·nikanirangko chagrongna nangengani gimin chingni karkanarangko chalaina gita chinga gipin a·songrangoniko koelarangko ra·baskana nangenga. Chinga Australia, Indonesia aro uandakgipa dingtang dingtang a·songrangoniko koelarangko ra·baengoba koelarang chu·ongkujaenga aro da·o Jharkhand-oniko bewalan koelarangko ra·bana man·engani gimin ian Bangladesh a·songo bading chiwalenggipa manderangna bang·a namgni ong·gnok,” ine Bangladesh a·songo koela badinge cha·enggipa manderangoni saksa SM Al Amin parakataha.
Bangladesh a·songona India a·songni koelarangko watatna rake kamrangko ka·engani gimin ua Georgeman Marak aro uni ripengrangkoba mittelpilataha.
