SHILLONG: Shillong Airport-oni Shillong songjinmaona manderangko salrurana gita ta·raken Bus gariko on·china Shillong Airport-ni official-rang, Meghalaya a·dokni Chief Secretary-na sedoataha.
Airport-oni Shillong, Nongpoh aro uandakgipa dingtang dingtang biaprangona prepaid taxi service-ko ta·raken a·bachengatna man·na gita taxi-ni damrangko tik ka·e on·china gitaba Airport-ni official-rang, a·dok sorkariko didiataha.
Chief Secretary-na sedoatgipa chittio Shillong Airport official-rangni parakatani gitade, da·o dipet Airport-oni Shillong-ona aro Shillong songjinmaoni Airport-ona manderangko salrurae on·gipa garirang dongkujaengani gimin manderang taxi-rangosa re·na nangenga aro da·o dipet taxi-ni damrangkoba sorkari tik ka·e on·a dongkujaengani a·sel manderang, Shillong, Nongpoh aro uandakgipa dingtang dingtang biaprangona gong 2000, 2500, 3000 aro una bateba taxi parako gamna nange neng·nikanirangko chagrongna nangtokengachim.
Batanggimin somoirangode Shillong airport-oni Shillong songjinmaona Meghalaya Transport Corporation (MTC)-ni Shuttle Bus-ko watachim indiba badiaba manderangni ka·mikkenatani gimin ia gari salruraaniko dontongatpilna nangaha ine janapatengon, airport-ona sokbaenggipa manderangko aro tourist-rangko salrurana gita ia shuttle bus-ko a·bachengattaiahachim indiba re·anggipa September 29 tarik dipet ia bus gariko badiaba manderang dontongattaiaha ine Shillong Airport-ni official-rang parakataha.
“Uni ja·mande Shillong Airport-oni Shillong songjinmaona manderangko salrurae on·gipa shuttle bus-ko chalaijaha aro da·o airport-oni Shillong songjinmaona manderangko salrurana gita gariko nangchongmotengaha,” ine airport official-rang, Chief Secretary-na sedoatgipa chittio parakataha.
