SHILLONG: United Democratic Party (UDP) una dakchakgenoba dakchakjagenchimode re·baenggipa 2023 bilsini Assembly election-o ua Nongkrem constituency-oni susagen ine a·dokni gitcham Deputy Chief Minister Bindo M Lanong parakataha.
UDP-ni adviser aro nominate ka·ako man·gipa MDC BM Lanong, 2009 bilsion bon·kame seokako man·ahachim indiba uni ja·man changgni election-ode uko East Shillong constituency-ni manderang jegaltokaiahachim.
East Shillong-o chu·sokna man·jahani gimin ua re·baenggipa 2023 bilsio UDP-ni tikitchi Nongkrem constituency-oni susana gita kamrangko ka·chakatna a·bachengskaahachim.
Indake ong·genchimoba, re·baenggipa bilsini election-na UDP-ni dilgiparang, Lambor Malngiang-kosa Nongkrem constituency-ni candidate-na mingskaaha aro ian Lanong-na jagokmanpilani gita ong·skaaha.
1997 bilsionin ua UDP-na kakket ong·e dangdike on·engoba, iandake UDP-ni tikitko gipin candidate-na on·aniara una namen ka·donga gri ong·ata gita ong·skaaha.
“Da·o dipet Nongkrem constituency-na UDP-ni candidate-ko paraksrangkujaengani gimin anga tikitko man·na ka·dongengkua indiba anga UDP-ni tikitko man·jagenchimoba ia election-o Nongkrem constituency-onin susagen,” ine Lanong parakataha.
