TURA: Re·anggipa Sonibar salo, Tura Don Bosco College-ni Internal Quality Assurance Cell (IQAC) aro National Service Scheme (NSS)-ni gita ‘Youth Leadership Program’-ko college-o poraienggipa chatro chatrirangna aro jolo donggipa chadamberangna ong·atangaha.
Ia program-ko ong·atanio Assistant Commissoner Sumit Kumar Singh, mongsonggipa sokgipa ong·e chadamberangna aganprakangengon, chadamberangni mongsonggipa neng·nikanirangko ma·sie ra·na nangchongmota maina chadamberangni neng·nikanirangchian songsalo so·sojengjeng ong·anirangba ong·katna man·a ine parakangaha. An·tangtangan namgipa dakmesokgiparang ong·e songsalna dingtanganiko ra·bagiparang ong·china gitaba ua chadamberangko didiangaha.
Ia program-ko ong·atanio South Garo Hills One Stop Centre-ni Protection Officer aro Centre Administrator Chingme R Marak, Tura Civil Hospital-ni Counsellor Narbecca G Momin aro Tura Don Bosco Higher Secondary Section-ni Principal Dr Fr Jogesh B Marak, program-o bak ra·gipa chadamberangna dingtang dingtang katta bichongrango pangchake, agan-ku·pattianirangko on·angskaaha.
Bon·kamao, ia program-o bak ra·gipa chadamberangna certificate-rangkoba suale on·angaha.
