TURA: Rashtriya Ekta Diwas-ko maniani bak gita Sombar salo, Tura-o donggipa 120 Battalion Central Reserve Police Force (CRPF) dol, ‘Run for Unity’ ba ku·cholsan ong·anina apsan katrimaniko Tura Dakopgre-o donggipa Coal India-oni Danakgre-ona ong·atangaha.
Ia apsan katrimaniko ong·atanio 120 Bn CRPF-ni sipairang baksana jolo songdongenggipa manderangba bakko ra·angaha.
Ia salko maniani bak gita dingtangmancha ku·cholsan ong·anina ku·mikchetani aro March Past-koba Tura-ni Dakopgre-o donggipa 120 Bn CRPF-ni headquarter-o ong·atangaha.
Bilsiantian October-ni 31 tariko, India a·songni skanggipa Deputy Prime Minister Sardar Vallabhbhai Patel-ni atchiani salko gisik ra·na gita ia salko National Unity Day ba Rashtriya Ekta Diwas ine manirongengachim.
