RESUBELPARA: Songni nokni manderangna aro muga jile cha·enggipa manderangna Mugarangko jilani bidingo agan-talate on·na gita awareness program-ko Resubelpara-ni Rompara-o donggipa Unit Farm-o ong·atangaha aro ia program-ko ong·atanio sak 80 manderang dongpae skie ra·angaha.
Ia awareness program-ko Rompara-o donggipa Central Silk Board, MESSO, P-3 Unit-ni gita ong·atangaha aro ia program-ko ong·atanio P-3 Unit-ni Scientist B Dr Vikram Kumar, jinmana aganprakengon, muga jile cha·enggipa manderangko bading business level-o ba bading chiwalani gadango mugarangko jilchina didina gita aro game ge·e cha·enggipa manderangni janggi tangani gadangko sericulture-chi ra·doani bidingo agan-talate on·na ia program-ko ong·atenga ine parakataha.
Ia awareness program-ko ong·atanio songni nokni manderangna agan-skie on·anggipa gipin manderangara, MESSO, P-4 Unit Tura-ni Scientist B Dr K Indrakumar, Resubelpara-ni District Sericulture Officer SG Momin aro gipinrang ong·a.
