SHILLONG: Police department-o garirangko bree jakkalsretanina rim·ako man·gipa police official Gabriel K Iangrai-ko sorkari kamoni dontongataha ine Budbar salo, a·dokni Deputy Chief Minister Prestone Tynsong parakataha.
Deputy Chief Minister-ni parakatani gitade, niamo pangchakesa sorkari ja·kurangko de·enga aro a·songo dongimin niam gitan ja·kurangko de·anggen.
Police officer-ko rim·ani ja·man, sorkarini gita dakna nanggni kamrangba donga ine janapatengon, dos dakgipa police officer-ni kosako ja·kuko de·ana agre sorkario maming gipin chol dongjaha ine Tynsong parakataha.
“Niamo pangchake uko rim·aha aro niamni gita kamko ka·aichina. Ja·mano chinga nangani kri ja·kuko de·angaigen,” ine ua aganaha.
Ia case-ko CBI ba ma·mongni gipin agency-rangni jako on·na nanggenchimma ine sing·on, niamo pangchaken ia police officer-ni kosako ja·kuko de·aha aro niamko rakkienggipa dolrangan iako jako ra·angaigen ine Deputy CM parakataha.
Iani bidingo High Court-onin u·iataniko on·manahani gimin ia a·selni bidingo maming dongnuani grian ma·sina man·aigen ineba ua aganaha.
Police department-ni gita tangka paisarangko jakkalsretanio jak dongani gimin Meghalaya a·dokni police official Gabriel K Iangrai-ko Budbar salo, Crime Investigation Department (CID)-ni Special Investigating Team (SIT) rim·ahachim.
Ia police officer-ni biap damgittamoniko, chong·motan Shyiap-o donggipa uni ma·gipani nok, police quarter-o donggipa uni nok aro Umsning-o donggipa uni farmhouse-oniko police-rang, am·sandianirangko dakenga aro da·o dipet uni ong·gija kamrangna jakkagipa lekkarangko man·ahachim.
Iani bidingo Meghalaya Lokayukta-ni gitaba a·dokni gitcham DGP R Chandranathan aro Iangrai-ko sing·sandina gita re·baenggipa November 15 tariko okamatengachim.
