SHILLONG: Salgittamna Umiam Sports Complex-o ong·atanggipa Rising Sun Water Fest 2022-ko Sonibar salo matchotataha aro ia program-ni bon·kamgipa salo, Assam a·dokni Chief Minister Himanta Biswa Sarma, mongsonggipa sokgipa ong·e bakko ra·angaha aro ia program-o bak ra·gipa manderangna aro dingtang dingtang dolrangna boksisrangko suale on·angaha.
Ia tom·anio Assam a·dokni Chief Minister, jinmana aganprakangengon, ia Rising Sun Water Fest-ko ong·atgipa committee-ko, program-o bak ra·gipa dolrangko aro ia program-ko chu·sokgipa ong·atna gita rakbee kamrangko ka·gipa Eastern Command-ni General Officer Commanding-in-Chief Lieutenant General RP Kalita-ko mittelpilangaha aro mikkangchiba iandakgipa chio kal·susaani program-rangko ong·atangkuchina didiangaha.
Ia Water Fest-ni bon·kamgipa salo, Assam a·dokoni dakmesokgipa Rupali Kashya-ni jatni bidingo dakmesokanirangko, Khasi Drummer-rangni git ring·ani aro chrok mesaanirangko aro uandakgipa dingtang dingtang dakmesokanirangkoba nikangna gita man·aha.
Ia Rising Sun Water Fest 2022-ko Indian Army aro Meghalaya sorkari, Khelo India program-ni bak gita nangrime ong·atangaha aro ia Water Fest-o ring chosusaani, cultural exhibition, art & craft exhibition, food fest aro dingtang dingtang kal·susaanirangkoba ong·atangaha.
