TURA: All Garo Hills Primary School Teachers Association (AGHPSTA)-ni chang 45-gipa annual conference ba bilsini tom·bimonganiko Bristibar salo, North Garo Hills a·jani Kharkutta-o ong·atangaha aro ia tom·bimonganio a·dokni Chief Minister Conrad K Sangma-ba dongpae bakko ra·angaha.
Ia tom·bimonganio a·dokni Chief Minister, skigiparangna aganprakangengon, Garo Hills-ni primary skulrangko 1994 bilsio GHADC-oniko a·dok sorkarina pakwate on·aonin skigiparang, an·tangtangni kamko regularize ka·china dabitokengani gimin da·o Non-Government Primary skulrango skigiparangkoba regularize ka·na gita sorkari kamrangko ka·engaha ine parakataha.
Songsalni namroro silroroanio lekka porako on·aniara namen nangchongmotgipa aro mongsonggipa bak ong·a ine janapatengon, dingtang dingtang neng·nikanirangko chagrongna nangengoba sorkari, lekka porako mongsonggipa daito ong·e ra·enga aro skigiparangni nangnikanirangko chu·sokate on·na sorkari kam ka·enga ine Chief Minister parakataha.
State Education Policy-ko tarianichi sorkari, a·doko lekka porani a·bako tang·doatna gita cholrangko man·engaha ineba ua aganaha.
2018 bilsio ia sorkariko rikchengani somoio a·dok gimiko donggipa dam 2558 LP skulrangoni dam 500-mangni gitade lekka porako on·chakna kragipa biaprangan ong·jahachim indiba ia sorkari da·o a·dok gimikon LP skulrangko taridapengaha ineba Chief Minister parakataha.
Garo Hills-ni Primary skulrangko 1994 bilsio GHADC-oniko a·dok sorkarina pakwate on·angskaahachim aro ia skulrangkon ‘Non-Government’ ine gadang donskaahachim.
Indake ong·engon, ia Non-Government Primary skulni skigiparangkoba regularize ka·e on·na sorkari kam ka·engaha ine Chief Minister-ni ku·rachakaniko on·angahani gimin Chief Minister-ko AGHPSTA-ni dilgiparang mittelpilangskaaha.
