TURA: Meghalaya a·dokni deficit skulrango skigiparangni dingtang dingtang dabianirangko a·dok sorkari knachakjaengani gimin Garo Hills Deficit School Teachers & Employees Association (GHDSTEA), suk ong·gijaniko parakatenba, skigiparangni man·na nangkuenggipa bangki dormaharangko aro arrear-rangko da·o Krismasna skangan on·china a·dok sorkario dabiangaha.
GHDSTEA-ni president James D Shira-ni parakatani gitade, deficit skulrango skigiparangni dingtang dingtang dabianirang, chong·motan, revised pay-ni bangki arrear-rangko on·china dabiani, DCRG-ko gong lak 3-oniko lak 10-ona bariatchina dabiani, deficit skulrango skigiparangna Modified ACPS-ko ra·gatchina dabiani, deficit skigiparangni Service Rule-rangko matchotatani aro kamoni neng·takgimin skigiparangna Social Security Benefit-rangko on·china dabianirangko uamang changni chang sorkari baksa agangrikani ja·manoba aro ia dabianirangko chu·sokate on·na ku·rachakanirangko on·ani ja·manoba da·onan ia dabianirangko sorkari chu·sokate on·kujaengachim.
“State Education Commission-ko songna a·dokni Cabinet tik ka·aha ine Chief Minister-ni parakataniko chinga kusi ong·e ra·chakengoba, mikkangchi chingni janggi tanganina aro chingni nokdangrangna chingo kenchakanirang dongskaenga. Chinga Khasi-Jaintia Deficit School Teachers Association (KJDSTA) baksa bakrime, chingni kosako janapgimin dabienggiparangna changni chang a·dok sorkari aro Education official-rang baksa agangrikahaoba da·alonan chingni dabianirangko knachakkujaenga,” ine GHDSTEA-ni president parakatenba, skigiparangni namgnina ia dabianirangko aro skigiparangni man·na nangkuenggipa dormaharangko da·o Krismasna skangan chu·sokatchina ba on·china ine a·dok sorkariko didiataha.
