SHILLONG: Meghalaya a·doko bobil dake chakatgipa Hynniewtrep National Liberation Council (HNLC) bobil dol da·o tom·tomaona re·bapilna gita sorkari baksa agangrikaniko a·bachengatahaon, HNLC bobil dolni membor sakbriko Shillong-o donggipa National Investigation Agency (NIA)-ni kachario mikkangpaechina gita u·iatskaaha.
NIA-ni iandakgipa ge·etaniko man·ani ja·man Budbar salo HNLC bobil dolni dilgiparang suk ong·gijaniko parakatskaaha.
HNLC bobil dolni Bobby Marwein, Marius Rynjah aro Sainkupar Nongtraw-ko man·chape sakbri dilgiparangko re·baenggipa 2023 bilsini January 4 tariko NIA-ni Special Judge mikkango mikkangpaechina gita u·iataha ine dingtang dingtang songbadrango parakatahachim.
Indake ong·engon, iandake HNLC bobil dolni dilgiparangko NIA-ni mikkango mikkangpaechina gita u·iataniara, bobil dolni tom·tomaona re·bapilna sorkari baksa agangrikna dongimin niamrangko pe·ani gita ong·aha ine HNLC-ni general secretary Sainkupar Nongtraw parakataha.
“A·dok aro ma·mong sorkari baksa agangrikaniko a·bachengatna skangan, ia agangrikaniko tom·tomao matchotatna man·na gita chingni pilak case-rangko ra·pilchengna nanga ine chinga namen talate on·ahachim aro sorkariba gitcham case-rangko kema ka·na ku·rachakahachim,” ine Nongtraw parakataha.
Nongtraw-ni parakatani gitade, NIA-ni charge sheet ka·anichi sorkari baksa agangrikanio maming champenganirang dongjawa ine a·dokni Chief Minister Conrad Sangma aro Home Minister Lahkmen Rymbui-ba ku·rachakaniko on·manahachim.
“Sorkarini baksa tom·tomanina agangrikengmiting somoio gital case-rangna HNLC-ni dilgiparangko NIA-ni mikkango mikkangpachina u·iataniara sorkarini ong·gija dakaniko mesokanisa ong·enga. Ian sorkari baksa agangrikanio chingna ka·dongna man·gijaniko mesokaniba ong·enga,” ine HNLC-ni general secretary parakataha.
Sorkari baksa tom·tomanina agangrikanio maming champenganirang dongjana gitan agangrikaniko a·bachengataoni da·alona kingkingan HNLC bobil dol maming so·sojengjeng ong·atani kamrangko ka·kuja ine Nongtraw parakataha.
2020 bilsini December 12 tariko, East Jaintia Hills a·jani Star Cement Factory Colony Lane-o donggipa quarter-ni sambao boma gopretani gimin HNLC-ni dilgipa sakbrini kosako NIA, charge sheet-ko file ka·ahachim ine nikna man·a.
