SHILLONG: Assam aro Meghalaya a·dokni simarango golmal ong·enggipa biaprangoni damdok biaprangko namatna gita Memorandum of Understanding (MoU)-ko soi ka·grikani ja·man da·o bangki dongkuenggipa damdok biaprangkoba namatna gita a·dok damgnini gisepo agangrikaniko a·bachengtaiahaoba adita salrangna skang, West Jaintia Hills a·jani Mukroh songo a·sel ong·anichi da·o dolgnini agangrikani somoi nangdapskagnok.
“Chinga ia antini gisepon tom·aniko ong·atna ka·dongsoengachim indiba ong·nanggija a·sel ong·anichi ia kamko ka·anio adita neng·nikanirang dongdapgnok. Da·o chinga ta·rakede agangrikna man·janaba dongaha,” ine Mongolbar salo, Meghalaya a·dokni Chief Minister Conrad K Sangma parakataha.
Ia gnigipa bako, regional committee-rang baksa skanggipa tom·aniko November jao ong·atna manchisoani dongachim ine nikna man·a.
A·dok damgnini simarango golmal ong·enggipa bangki damdok biaprangko namatna gita a·dok damgnini chief minister-rang, adita jarangna skangsan Guwahati songjinmao tom·e agangrikna a·bachengatahachim.
Indake ong·engon, Mukroh songo ong·gipa a·sel gita mikkangchiba ong·taijana gita sorkari, ia kamko ta·raken matchotatna nangnikenga ine Chief Minister parakataha.
Mukroh songo ong·gipa a·selni gimin janapatengon, “Ia ong·nanggija a·sel ong·ahani gimin da·o obostarang dingtangaha aro chinga Assam aro India sorkarirang baksa agangrikna gita somoirangko ra·dapna nanggnok,” ine Sangma aganaha.
