TURA: NPP BJP-ni ‘B Team’-sa ong·a ine aganenba, BJP, ia chang 2023 bilsini election-rangna gimikni gitan pilakon tiktak tarisomanaha aro ia chango darang party baksaba bakrimgija dolsantangtang susaaigen ine Tura-ni BJP MDC Bernard N Marak mijal Robibar-o aganaha.
“2023 election-rango BJP nambate dakgen maina BJP ia chango pilak tariani-rango nambatroroenga aro dolsantangtang susana tarienga. Skang bilsirango BJP, NPP baksa kam ka·aha indiba chinga dingtang dingtang gadangrango sin·jetaniko man·aha indake party bang·a skiako man·aha. NPP pangna election-rangmitingo dal·dala kamrangko ka·ronga maina NPP BJP-ni B Team ge·sa ong·a indake 2023 bilsini election-o ong·na gita on·jawaha. Ia chango chinga dolsantangtang susana tarienga aro gipin bilsirango gita susaani-rangna pilakkon tarisoa-nirang tiktak ong·manaha,’’ Tura-ni MDC aganaha.
A·dokko tang·doatna BJP-ni bang·bee tangka-paisa chamatanirangko man·a NPP uandake gipin dilgiparang cholko ra·enga aro ka·dongenga indiba maming saloba indake ong·na on·jawa, Bernard matnangaha.
“BJP cha·bok-rusianiko bon·atgen. A·doko tang·-doatna BJP-ni chamatgipa tangka-paisarangko jakkal-sretna-cha·bok-rusinasa NPP-na aro tangka-paisako jakkalsretna gipin dilgipa-rangna chol on·a gita dakaia. BJP maming saloba jrip dongjawa. Chingni dilgiparang ru·utgijaan ua cha·bok-rusianiko sandi-gen,’’ Bernard mikrakataha.
A·bachenga gadango party namengaha ine a·kange BJP-na kam ka·-giparang man·dapanina rikja indiba on·kange kam ka·giparang ong·a je-mangan uamangni somaio on·kange kam ka·aha aro ia party-ni bilakanichi song-salna namako dakani biteko nikgen ine Tura MDC aganaha.
“Skang bilsirango seat-rangko sualanio dal·begipa kamko ka·aha jeon uamang BJP-ko chena on·jaha. BJP ia chango pilak kamon tiktak tarimanaha aro re·anggipa changni MDC election-o Tura seat-nian re·baenggipa changni election-oba cheani sakki ong·enga. Unagreba a·bachenggipa gadango kangal-cholgrirangna BJP maiko dakaha manderang uko ma·siaha. Ia kratcha-gijagipa cha·bok-rusiani namgija kamo bang·bata gipin party-rang jak donga aro tangkana aro bilna mikbokgiparang ong·a. BJP-ni chamatgipa tangka-paisako sakantian ma·sia,” Bernard agandapaha.
