Dakopgre-o Megha-Lamp project-ni ning·o interaction prog-ko ong·ata

TURA: West Garo Hills Tura Dakopgre-o donggipa SMELC building-o IFAD-ni Megha-Lamp Project aro Meghalaya sorkarini a·bachengatgipa Focus program baksa, Prime Start Up aro World Bank-ni CLLMP Project, iarangni ning·o ru·utgija salo Knowledge Sharing Event-ko ong·atgipao salsana interaction aro innovative session-koba ong·atjolaha.
Jeon manderang gadangko dakna aro tom·aoniko jedakode gipinrang namgnirangko man·gen indakgipa agangrikani format-o uamang uamangni u·i-ma·sianiko agangrikna man·gen uni gimin ga·timrako ong·atna programme-ko ong·atani miksongani ong·a. An·tangtangni u·i-ma·sianiko agangrikna ong·atgipa tom·ao West Garo Hills District-ni pilak block-rangoni bakko ra·aha. Uno dakna ka·na sikgipa manderang, a·bachengatgiparang aro badingchiwalgiparang ong·telaigipa bakrangko rakkiani, chi aro buring-bolgrimrangko ripangani, me·chikrangni bil gnangani, gital dakani, namgipa sorkariko rikani, badingchiwalani, kamrangko a·bachengatani, Producer Group activities, Homestays, Apiculture, weaving unagreba gipinrangni gimin uamangni u·i-ma·siani kattarangko badingchiwalgiparang agangrikaha.
West Garo Hills Additional Deputy Commissioner, Rezia Ch. Sangma, Chief Guest ong·e agangrikengon, jatni gita manderang aro tom·ao bakko ra·giparang saksa sakgipinoniko skie ra·na man·gen indakgipa didiani aro manderangna agange on·a jatni gita pangchakgipa u·i-ma·sianirangko agangrikna indakgipa program-ko ong·atanina ong·atgiparangko mittelaha.
District Project Manager MBMA/MBDA West Garo Hills-ni V Velentine Hembrom, tom·ako chalaiaha aro daitoko jako ra·e kam ka·giparangko aro jatni gita agangrikgiparangko agan-talate on·angaha.